Аллелюя

Габрыэля Пузыня

 

Дзень вясёлы наступае —

Збаўцу чалавек вітае,

вясна ў душах зацвітае!

Аллелюя!

 

Смутак нішчыцца імкліва,

і глядзіць з-пад снегу ніва,

грэх знікае палахліва.

Аллелюя!

 

З гэтай велічнай нагоды

з гор плывуць патокам воды,

з вачэй — слёзы асалоды!

Аллелюя!

 

Езус пекла парваў путы,

грэх адолеў жаль пакуты,

снег у зелень апрануты.

Аллелюя!

 

Маці, боль Твой адыходзіць:

Хрыстус Сын з труны выходзіць,

спеў анёльскі слых лагодзіць —

Аллелюя!

 

Покуль шлях зямны наш тчэцца,

хай ён з цернямі спляцецца

і ў вышыні ўпарта мкнецца.

Аллелюя!

 

Калі ж неба годны станем,

разам з мёртвых усе ўстанем,

зноў спяваць не перастанем —

Аллелюя!

 

Пераклад з польскай мовы 

Ірыны Багдановіч.

 
© 2019 - Рэдакцыя часопіса «Ave Maria» Мінска-Магілёўскай архідыяцэзіі Рыма-каталіцкага Касцёла