У новы навучальны год — з новым камплектам падручнікаў

Памятаю, як на пачатку кожнага новага навучальнага года для мяне самым хвалюючым момантам было атрыманне новых падручнікаў. Я з дзяцінства моцна любіла кнігі. І вучыцца, зрэшты, таксама. Таму з асалодаю гартала старонкі толькі што атрыманых дапаможнікаў, разглядала малюнкі, чытала загалоўкі тэмаў, гладзіла пальцамі па паперы, ужо загадзя смакуючы тое, як я буду з гэтымі кнігамі працаваць… Асаблівую радасць прыносілі зусім новенькія падручнікі, з каляровымі ілюстрацыямі і яркім афармленнем.


Гэтае пачуццё мне ўзгадалася акурат тады, калі я на днях узяла ў рукі новы камплект кніг па катэхезе для першага года падрыхтоўкі да сакрамэнтаў пакаяння і Эўхарыстыі «Бог любіць цябе», складзены сястрой Нунэ Цітаян  MSF («Про Хрысто», 2018). У яго ўваходзяць дапаможнік і працоўны сшытак для заняткаў. Вялікага фармату, яркія, каляровыя, выдадзеныя на высокаякаснай паперы, гэтыя кнігі ў мяне самой выклікалі настальгію і нават жаданне яшчэ раз павучыцца.

У камплекце прапануецца 29 тэмаў, якія знаёмяць маленькіх вернікаў з галоўнымі праўдамі хрысціянскай веры, асноўнымі падзеямі з жыцця Езуса Хрыста, а таксама з некаторымі набажэнствамі і традыцыямі Каталіцкага Касцёла. Усе тэмы дапаможніка пабудаваныя па аднолькавым прынцыпе: напачатку падаецца сціслы тэарэтычны матэрыял, выкладзены простаю і даступнаю для дзяцей моваю. Пасля прапануецца кароткі ўрывак са Святога Пісання на адпаведную тэму. Пад рубрыкаю «Мой катэхізіс» друкуюцца малітвы або галоўныя праўды веры, якія дзіця павінна ведаць на памяць. Да кожнай тэмы падабраная адпаведная рэлігійная песня, якую дзеці змогуць лёгка засвоіць дзякуючы аўдыёдадатку — дыску, які прапануецца да камплекта. На ім запісаныя песні, сабраныя ў дапаможніку, у выкананні дзіцячага хору парафіі св. Казіміра з Маладзечна. Да кожнай тэмы пададзеныя па два запісы — з вакальным суправаджэннем і без яго (мінусавая фанаграма). Дзякуючы гэтаму дзіця нават дома з бацькамі можа развучваць кожную песню.

У сшытку для заняткаў на кожную тэму прапануюцца па два заданні (акрамя хатняга задання). Кожнае з іх грунтуецца на моцным візуальным успрыняцці дзіцем новага матэрыялу — вучні з задавальненнем будуць расфарбоўваць малюнкі, рабіць уласныя ілюстрацыі на зададзеную тэму, апісваць намаляванае, расшыфроўваць рэбусы, складваць пазлы, разгадваць крыжаванкі. Многія заданні скіраваныя на асацыятыўнае мысленне, на засвойванне Святога Пісання, на развіццё творчых здольнасцяў. Я параіла б дзецям і бацькам пасля выкарыстання гэтага сшытка захаваць яго сабе на памяць — пасталеўшы, дзеці з радасцю прачытаюць свае запісы пра тое, як яны хацелі ўшанаваць крыж, якія пастановы выбіралі сабе на час посту, дый проста ўзгадаюць часам забытыя праўды веры… (Я цяпер таксама люблю пераглядваць свае старыя сшыткі і запісы па катэхезе і дзякуючы гэтаму нават час ад часу разумею, у чым караняцца некаторыя мае погляды на рэлігійнае жыццё.)

У сшытак увайшлі лісты з наклейкамі, якія даюць магчымасць больш творча падыходзіць да выканання шматлікіх заданняў і дапамагаюць візуалізаваць інфармацыю.

Застаецца дадаць, што камплект кніг, падрыхтаваны сястрой Нунэ Цітаян MSF, зробіць заняткі па катэхезе яшчэ больш займальнымі і цікавымі —настолькі моцна гэтыя падручнікі зараджаюць жаданнем вучыцца, насычаюць энергіяй і проста ўздымаюць настрой.


Ганна Шаўчэнка

Набыць падручнік можна:

  • у кнігарні «Духоўная кніга» (г. Мінск, вул. Багдановіча, 25, пн–пт: 11.00–18.00);
  • у парафіяльных кіёсках і пробашчаў парафій;
  • альбо звяртайцеся ў рэдакцыю па тэл. (017) 293 17 50.
 
© 2018 - Рэдакцыя часопіса «Ave Maria» Мінска-Магілёўскай архідыяцэзіі Рыма-каталіцкага Касцёла