«Ідзі дарогай надзеі» — запрашае 3-ці нумар часопіса «Ave Maria»

12 сакавіка часопіс выйшаў з друку.

Выбар — адна з найскладанейшых праблемаў нашага жыцця, з якой мы сутыкаемся штодня ў вялікіх і дробных справах. Ён патрабуе рашучасці і адначасова ўмення сумнявацца; адказнасці і адначасова свабоды волі; веры ў свае сілы і разумення сваёй слабасці... Прайсці па няпростых шляхах свайго і чужога выбару запрашае чарговы нумар часопіса «Ave Maria».

Неспадзяванаю навіною для католікаў усяго свету стала рашэнне Папы Рымскага Бэнэдыкта XVI аб сыходзе з пасады Наступніка святога Пятра, а для вернікаў Каталіцкага Касцёла ў Беларусі — яшчэ і рашэнне біскупа Уладзіслава Бліна скласці з сябе паўнамоцтвы пастыра Віцебскай дыяцэзіі. Матэрыялы часопіса, прысвечаныя гэтым падзеям («Зварот арцыбіскупа Тадэвуша Кандрусевіча...», прамова папы Бэнэдыкта XVI на яго апошняй генеральнай аўдыенцыі і слова кс. Уладзіміра Шымковіча ад імя вернікаў Віцебскай дыяцэзіі) вучаць з павагаю і малітоўнаю падтрымкаю ставіцца да выбару кожнага чалавека, а таксама цаніць тое, што мы мелі і маем на шляху, які прайшлі разам з вялікімі пастырамі.

* * *
«Святая Вераніка. Будзь вольным ад несапраўдных вобразаў» — так называецца раздзел з кнігі Анзэльма Груна «Пяцьдзясят памочнікаў у нягодах», у якім аўтар запрашае паразважаць над мноствам сітуацый нашага ўласнага духоўнага выбару. Тэолаг разглядае разнастайнасць гэтых сітуацый на адным прыкладзе — адважнага выбару святой Веранікі, якая, адлучыўшыся ад натоўпу, выцерла твар знясіленаму Езусу сваёй палатнянаю хусткаю і была ўзнагароджана нерукатворным гаючым вобразам Хрыста на палатне.

* * *
Прастораю, якая вымагае ад чалавека штодзённага выбару ў самых разнастайных сферах, з’яўляецца сямейнае жыццё. Гэтай тэме прысвечана інтэрв’ю Анастасіі Кавалеўскай са шматдзетнымі бацькамі Ірынай і Віктарам, дзе закранаецца важнае пытанне: што рабіць, калі ў сям’і нараджаецца асаблівае дзіця (у гэтым выпадку — з сіндромам Даўна)?

* * *
У нумары змешчаны першыя матэрыялы, дасланыя на конкурс «Будслаў — прызнанне ў любові»: эсэ Уладзіміра Вайцяховіча і Аксаны Ючкавіч.

Чытайце таксама іншыя матэрыялы часопіса, натхняйцеся незвычайнымі сведчаннямі, карыснымі духоўнымі парадамі і... памятайце пра іх на раздарожжах свайго духоўнага жыцця.

 
© 2019 - Рэдакцыя часопіса «Ave Maria» Мінска-Магілёўскай архідыяцэзіі Рыма-каталіцкага Касцёла