Новы нумар квартальніка «Наша вера»


Выйшаў з друку першы ў 2013 г. нумар культурна-рэлігійнага квартальніка «Наша вера». Прапануем вашай увазе рэзюмэ, з якога вы даведаецеся пра змест часопіса, і заахвочваем да яго набыцця ў мінскай кнігарні «Духоўная кніга» і ў касцёльных кіёсках. 

Гэты нумар часопіса распачынаецца зваротам арцыбіскупа Тадэвуша Кандрусевіча да духавенства і вернікаў у сувязі з сыходам папы Бэнэдыкта XVI з пасады Наступніка святога Пятра.

«Вялікі выбух меў свой выбух» — так называецца інтэрв’ю галоўнага рэдактара часопіса «W drodze» а. Р. Бяляцкага з вядомым дамініканінам а. П. Крупам, дзе яны разважаюць пра сэнс першых словаў Credo — «Веру ў Бога…».

400-годдзю з’яўлення абраза Маці Божай у Будславе прысвечаны матэрыялы «Легенда пра Будслаў у “Літвінскіх малюнках” Ігната Ходзькі» Г. Шаўчэнка, эсэ рэстаўратара А. Шпунта «Разлівы святла» і эсэ скульптара А. Шатэрніка «Зімовы пленэр у Будславе» (малюнак касцёла змешчаны на вокладцы часопіса).

У інтэрв’ю «Спазнаць радасць і свабоду» пісьменніца І. Жарнасек гутарыць з айцом дамініканінам Т. Мікам пра рэальныя магчымасці вернікаў сустрэць жывога Бога ў сённяшнім свеце.

70-годдзю росіцкай трагедыі прысвечаны артыкул І. Жарнасек «З пакутаў, мучэнняў, ахвяры…».

Мастацтвазнаўца В. Буйвал у рубрыцы «Галерэйка» апавядае пра адну з найлепшых карцін вялікага іспанскага мастака Хусэпэ дэ Рыбэра «Святая Агнешка ў вязніцы».

«Чатыры віды любові» — так называецца праца англійскага пісьменніка і багаслова К. С. Льюіса, урывак з якой прапануецца чытачам у перакладзе Ю. Шэдзько.

Працягваецца публікацыя перакладу А. Жлуткі працы Стэфана Свяжаўскага «Святы Тамаш, прачытаны нанава» — раздзел VIІ «Сутнасць Бога і яе пазнавальнасць».

Ксёндз К. Бардонаў прапануе ўвазе чытачоў артыкул «Рэлігійнасць герояў паэмы Якуба Коласа “Новая зямля”», дзе разважае пра гарманічнае суіснаванне лацінскай і візантыйскай традыцый у сялянскім побыце.

Доктар філалагічных навук А. Мальдзіс у артыкуле «Няхай абраз зноў творыць цуды» апавядае пра свае намаганні вярнуць на радзіму абраз Маці Божай Юравіцкай.

Каталіцкім святыням Астравеччыны прысвечаны артыкул архітэктара А. Яроменкі.

Літаратуразнаўца Я. Янушкевіч у артыкуле «Духоўныя апекуны Паўлюка Багрыма» звяртаецца да ролі крашынскіх ксяндзоў В. Магнушэўскага і К. Жураўскага ў станаўленні асобы таленавітага паэта і каваля.

У рубрыцы «Паэзія» друкуюцца вершы беларускіх паэтаў М. Дуксы і А. Данільчык, а таксама пераклады вершаў рускага паэта Д. Мізгуліна (Ханты-Мансійск), зробленыя П. Макарэвічам.

120-годдзю з дня нараджэння Канстанцыі Буйло прысвечаны артыкул «Люблю» вядомай беларускай паэткі Д. Бічэль.

Рэстаўратар і калекцыянер І. Сурмачэўскі ў артыкуле «Абраз Полацкай Багародзіцы XVI ст.» распавядае пра нялёгкую працу рэстаўратараў, якія вяртаюць з нябыту святыя абліччы.

Д. Бічэль у артыкуле «Пра “Забыты вернісаж”, і не толькі…» піша пра новую кнігу Н. Маліноўскай-Франке, прысвечаную творчасці амаль невядомых мастакоў Гродзеншчыны 1860–1930 гг.

 
© 2019 - Рэдакцыя часопіса «Ave Maria» Мінска-Магілёўскай архідыяцэзіі Рыма-каталіцкага Касцёла