Выйшаў у свет чарговы нумар часопіса для дзяцей «Маленькі рыцар Беззаганнай»

Іншыя багі. Якія яны? Ці можа так здарыцца, што мы ім пакланяемся сёння? Над гэтым актуальным пытаннем разважаюць айцец марыянін Віталь Даніловіч, дзеці з Жодзіна і Барысава. Першай запаведзі Дэкалогу прысвечаныя і «Загадкі з Бібліі», якія чытачы часопіса з задавальненнем адгадваюць. Апавяданне Ірыны Жарнасек «Гэта наша свята», старонкі сучасных скаўтаў прапануюць чытачам паразважаць над дабром і злом у нашым жыцці, грахом і пакорай, пакаяннем.

Як у сучасным свеце заставацца верным Хрысту, як размаўляць з Богам, каб твая малітва мела вынік, як можна ўпрыгожыць велікодны стол? Пра гэта таксама распавядаецца ў матэрыялах часопіса. Ягоныя чытачы ўбачаць чарговы раз у ім свае здымкі, малюнкі, допісы. А новая прыгода ксяндза Лявона можа прымусіць задумацца тых, хто спадзяецца толькі на сучасныя тэхналогіі ды ўласныя сілы.

Чытайце разам са сваімі дзецьмі «Маленькі рыцар Беззаганнай»! Адкрывайце для сябе і сваіх дзяцей свет дабра і любові!

 
© 2019 - Рэдакцыя часопіса «Ave Maria» Мінска-Магілёўскай архідыяцэзіі Рыма-каталіцкага Касцёла