Езус у маім жыцці

Дваццаць першая звычайная 

нядзеля — 21 жніўня 2011 г.

Чытанні: Іс 22, 19–23; Пс 138 (137), 1–2а. 2bc–3. 6–8bc; Рым 11, 33–36;

Евангелле паводле Мацвея 16, 13–20

Езус у маім жыцці

«А вы кiм лiчыце Мяне?» — пытаецца Пан Езус у сваiх вучняў. Гэтае пытанне, зададзенае Настаўнiкам  дзве тысячы гадоў таму за­стаецца актуальным i па сённяшнi дзень. Кiм жа лiчаць Пана Езуса сёння? Кiм Ён з’яўляецца для большасцi людзей?

Традыцыйны мусульманiн, якi добра ведае Каран, напэўна скажа, што гэта адзiн з най­вя­лiк­шых прарокаў. Для кагосьцi Пан Езус бу­дзе палiтычным  лiдэрам, адным з першых рэвалюцыянераў, абаронцам слабых i нямоглых.  А хтосьцi, паўтараючы за св. Пятром, з захапленнем i трымценнем прызнае ў Езусе Хрысце свайго Пана i Збаўцу свету. Бо менавiта сустрэча з Езусам цалкам перамянiла яго жыццё, даючы яму новую якасць i палёт. Бо дзякуючы Езусу адчуў ён у сабе здольнасць быць новым чалавекам, чалавекам, у якiм ужо валадарыць Божая ласка, а не грэх.

Але большасць людзей у сучасным грамадстве, хоць i чула пра Езуса Хрыста, хутчэй будзе захоўваць пэўны нейтралiтэт і нават абыякавасць да Яго Асобы, кiруючыся ў жыццi ўласнымi планамi, а не Божай воляй.  Зрэшты, пра такую абыякавасць і пасрэднасць піша нам аўтар Апакалiпсісу, кажучы, што найгоршым станам для чалавека  ёсць цеплыня (пар. Ап 3, 14–16).  А менавiта такi стан, калi чалавек мае атрафiраванае сумленне i няздольны спачуваць iншаму чалавеку.

А для мяне асабiста кiм з’яўляецца Пан Езус? Цi я схiляю перад Iм сваю галаву i станаўлюся на каленi, тым самым вызнаючы ў Iм Валадара ўсяго сусвету, бачнага i нябачнага? Цi размаўляю з Iм як з найлепшым сябрам, аддаючы Яму свае клопаты i трывогi? Цi мая радасць з’яўляецца таксама i радасцю майго Пана? Амэн. 

Айцец Віталь Сапега ОР

Мы вельмі радыя
бачыць вас на сайце
часопіса «Ave Maria».
Гэта плён працы
неабыякавых людзей,
якія з радасцю ствараюць
гэты часопіс для вас.

Падпіска
Ахвяраванні

Сайт часопіса „Ave Maria“ Мінска-Магілёўскай архідыяцэзіі Рыма-каталіцкага Касцёла ў Беларусі

Часопіс існуе дзякуючы вашым ахвяраванням. Сёння мы просім вашай дапамогі — нават невялікая сума падтрымае нас.

Падрабязней