Ці гатовы ты быць Яго вар’ятам?

Хрысціянства. Як цудоўна гучыць гэтае слова! А ці гатовы ты пацярпець за сваю веру? Ці гатовы стаць Божым вар’ятам у гэтым свеце? Такім, на якога б усе паказвалі пальцам? 


Я цяпер кажу не пра маральны мазахізм, калі чалавек спецыяльна шукае на сваю галаву прыгодаў, а пра здаровае хрысціянства, калі ты з’яўляешся хрысціянінам (ці хоць бы стараешся ім быць) у штодзённым жыцці, нягледзячы на перашкоды і цяжкасці.

Гэта як агонь Святога Духа, Які сышоў на Апосталаў. Ты побач з Ім, і страх адступае, з’яўляецца прага несці Яго слова і праўду іншым людзям. Ты адчуваеш, што гэта сыходзіць не ад цябе, а аднекуль звыш. Менавіта ў такія хвіліны ты разумееш, што Бог побач і заўсёды клапоціцца пра цябе. Нават калі ўвесь свет супраць цябе. У такія хвіліны ты здольны супрацьстаяць натоўпу і ісці да канца.

Аб такім натхненні Святога Духа варта прасіць у Бога, заўсёды прасіць аб Яго падтрымцы і апецы,аб незвычайнай радасці і супакоі ў сэрцы, якія былі ў Апосталаў адразу пасля Спаслання Святога Духа. Многія, хто іх бачыў, казалі, што яны былі быццам п’яныя. Але гэта быў эфект Божай прысутнасці ў іх сэрцах. Яны ўжо не былі тымі Апосталамі, якія закрыліся ў вячэрніку ад юдэяў і баяліся выйсці. Страх знік, і з’явілася сапраўдная лёгкасць і радасць. Агонь Святога Духа пачаў запальваць не толькі іх, але і астатніх людзей, якія чулі іх прапаведаванне.

Ці гатовы я быць Яго вар’ятам? Пытанне, якое часам варта сабе задаваць, але і ў ім ёсць Божая воля. Вар’яцтва хрысціяніна — гэта найперш Божы Провід. Яно не ўзнікае само па сабе, і часта яму папярэднічае доўгі шлях пошукаў і малітвы.

Вар’яцтва хрысціяніна — гэта супрацоўніцтва з Богам, поўны давер да Яго і разуменне, што ўсё ў Яго руках. Гэта таксама разуменне, што любая слава, удзячнасць, прызнанне людзей і ўвогуле свету — не галоўнае. Галоўнае — быць верным Яму. «Бо якая карысць мне, калі я здабуду ўвесь свет, а душы сваёй нашкоджу?» Слава гэтага свету — пустая. Найперш трэба шукаць Яго Валадарства. І калі ты шукаеш яго, то абавязкова атрымаеш. Калі ставіш Бога на першае месца — усё астатняе становіцца на сваё.

Гэта рызыка, гэта вялікая рызыка — быць Яго вар’ятам. Можна быць абсмяяным, прыніжаным, страціць сяброў, знаёмых, працу, але, калі ты давяраешся Яму, любыя цяжкасці ўспрымаюцца як благаслаўленне. Ён уздымае, спасылае спакой і веру, дае трываласць тваім крокам, яснасць думкам і найвялікшую адвагу ісці дарогай свайго жыцця побач з Ім.

Гэта вялікая рызыка — быць вар’ятам Хрыста, але яна вартая таго, каб пражыць сапраўды хрысціянскае жыццё, каб прайсці тым шляхам, які Ён табе падрыхтаваў.


Марына Валасар
Фота Данііла Ліцкевіча

Мы вельмі радыя
бачыць вас на сайце
часопіса «Ave Maria».
Гэта плён працы
неабыякавых людзей,
якія з радасцю ствараюць
гэты часопіс для вас.

Падпіска
Ахвяраванні

Сайт часопіса „Ave Maria“ Мінска-Магілёўскай архідыяцэзіі Рыма-каталіцкага Касцёла ў Беларусі

Часопіс існуе дзякуючы вашым ахвяраванням. Сёння мы просім вашай дапамогі — нават невялікая сума падтрымае нас.

Падрабязней