У гэты неспакойны час, калі каранавірус пагражае нашаму здароўю, у час духоўнага выпрабавання, калі змяняецца наш прывычны ўклад сакрамэнтальнага жыцця, Касцёл дае магчымасць прыступаць да духоўнай святой камуніі. Звычайна яна рэкамендуецца тым, хто не можа ўдзельнічаць у святой Імшы, асабліва ў нядзельнай, а гэта значыць хворым, тым, хто імі апякуецца, вязням і іншым людзям, якія сапраўды не могуць трапіць у касцёл. Сёння гэтай магчымасцю з дазволу касцёльных уладаў могуць скарыстацца таксама пажылыя людзі, дзеці і моладзь, а таксама ўсе тыя, хто асцерагаецца заражэння, таму не наведвае святыню.

Што такое духоўная камунія? 

Лацінскае слова communio азначае «еднасць», і менавіта такая мэта сакрамэнтальнай святой Камуніі — прымання Цела і Крыві Хрыста ў Эўхарыстыі ў выглядзе хлеба і віна. <…> Езус Хрыстус нам дае сябе самога, а мы Яго прымаем. Ён прабывае ў нас, а мы — у Ім. Ён знаходзіцца ў нас, мы жывем Яго жыццём — жыццём Божага Сына, з’яднанага з Айцом у Духу Святым. Такім чынам, у Камуніі чалавек прымае ў сябе жыццё Найсвяцейшай Тройцы, далучаецца да крыніцы жыцця. <…>

Духоўная камунія — гэта духоўны акт малітвы, мэта якога ў дасягненні такой еднасці з Хрыстом (ці, лепш сказаць, уваход у такую еднасць), якую дае нам прыманне ў Найсвяцейшым Сакрамэнце Яго Цела і Крыві, але не ў сакрамэнтальным вымярэнні. <…>

Як прымаць духоўную камунію?

Па сутнасці духоўная камунія заключаецца ў тым, каб узбудзіць у сэрцы моцнае жаданне з’яднацца з Езусам такім самым чынам і з такім жа плёнам, як гэта адбываецца, калі мы прымаем Эўхарыстыю. 

Таму для гэтай практыкі перадусім неабходна любоў да Езуса і жаданне быць з Ім у еднасці, вера ў Яго рэальную прысутнасць у Эўхарыстыі, усведамленне, прынамсі агульнае, таго, наколькі вялікім дарам яна з’яўляецца, і як наступства — моцнае жаданне яе прыняць. <…>

Сам спосаб прыняцця духоўнай камуніі можа выглядаць вельмі проста і мець форму кароткай малітвы ці наогул узнёслага акту — імгненнага пабожнага пачуцця, што суправаджаецца некалькімі словамі праслаўлення, падзякі, перапрашэння ці просьбы. <…>

Важна паклапаціцца пра тое, каб духоўная камунія адбывалася ў спакоі і засяроджанасці, з павагаю і поўным усведамленнем значнасці моманту. <…>

Якія ўмовы прымання духоўнай камуніі?

На гэты конт існуюць розныя меркаванні. Таму паспрабуем разабрацца з гэтым пытаннем у духу вучэння Касцёла і ў адпаведнасці са «здаровым сэнсам». Калі чалавек знаходзіцца ў стане цяжкага граху і не мае рашучай пастановы выправіцца і больш не грашыць, гэта робіць для яго немагчымым з’яднанне з Богам як у сакрамэнтальнай святой Камуніі, так і ў кожным іншым пабожным акце.

Цяжкі, або смяротны грэх становіцца рэальнай і аб’ектыўнай перашкодай для поўнай еднасці чалавека з Богам.

Таму варта правесці адрозненне паміж поўнай (наколькі магчыма) духоўнай камуніяй і тугою па еднасці з Езусам у Эўхарыстыі. 

Больш падрабязна пра духоўную камунію чытайце на сайце catholic.by. Ніжэй мы прапануем вам паглядзець відэа, якое запісаў генеральны вікарый Архідыяцэзіі Маці Божай у Маскве ксёндз Кірыл Гарбуноў пра духоўную камунію. Ён падрабязна расказаў пра гэтую форму, а таксама пра тое, як развівалася эўхарыстычная практыка ў гісторыі Касцёла.

">

Дарагія чытачы, мы прапануем вам тэкст малітвы папы Францішка, якая можа дапамагчы вам прыступіць да духоўнай святой камуніі. 

Акт духоўнай святой камуніі паводле папы Францішка

Схіляюся ля Тваіх ног, о Езу мой, і ахвярую Табе пакаянне майго скрушанага сэрца, пакорнага ў сваёй мізэрнасці і ў Тваёй святой прысутнасці. Адарую Цябе ў сакрамэнце Тваёй любові. Прагну прыняць Цябе ў гэтай убогай святыні, якую прапануе Табе маё сэрца. У чаканні радасці сакрамэнтальнай камуніі хачу прыняць Цябе духоўна. Прыйдзі да мяне, о Езу мой, каб я прыйшоў да Цябе. Няхай Твая любоў распаліць усяго мяне на жыццё і на смерць. Веру ў Цябе, давяраю Табе, люблю Цябе. 

Падрыхтавала Вольга Качалка
Паводле: catholic.by (пераклад з pl.aleteia.org), it.aleteia.org