Каталіцкі музычны гурт Laudans нядаўна прэзентаваў свой " target="_blank" rel="noopener noreferrer">новы кліп на песню «Воблака». Гэта другі па ліку відэаролік калектыву. За некалькі дзён відэа набрала амаль тры тысячы праглядаў на канале Youtube.
«Сёння вельмі часта мы сустракаемся з тым, што людзі закопваюць свае таленты ў «глебе» тэлебачання, інтэрнэту, алкаголю і іншых залежнасцяў. Гэта ўсё аддаляе нас ад рэальнасці і «дапамагае» забыцца пра тое, што жыццё — гэта дзейнасць. Мая і твая дзейнасць. Гэта праца», — гаворыць саліст гурта Андрэй Лугін, распавядаючы пра сюжэт кліпа.
Песню «Воблака» музыка напісаў, натхніўшыся адпачынкам у гарах. Аднойчы, перад узыходам на гару разам са сваімі сябрамі Андрэй убачыў вялікае воблака, якое нібы павісла на вяршыні.
«Мы рушылі, і шлях аказаўся няпросты. У некаторых быў нязручны абутак, таму ім трэба было таксама дапамагаць. Але я падумаў тады, што ўсе гэтыя цяжкасці вартыя таго, бо ў нас ёсць унікальная магчымасць «увайсці ў воблака». Калі ж урэшце мы апынуліся на вяршыні і здавалася, што зараз будзе гэтая вялізная «падушка», аказалася, што там быў звычайны туман — жыхары гор гэта так і называюць — імгла. Расчараванне. Мы палюбаваліся пейзажамі і пайшлі назад», — узгадаў Андрэй Лугін.
Праз некалькі год, калі музыкант перажываў пэўныя цяжкасці, ён узгадаў свой пад’ём на гару і тое воблака. Менавіта тады ён падумаў, што «туман адлюстроўвае людскую еднасць».
«Калі глядзець на воблака зблізку, мы бачым асобныя пылінкі вільгаці, а здалёк — гэта цэлае воблака. Так і чалавек: адзін не можа шмат зрабіць, а ўсе мы разам, аб'яднаўшыся ў Касцёле, утвараем Цела Хрыста. А Хрыстус можа ўсё! Ён мацнейшы за алкагольную залежнасць, больш рэальны, чым анлайн знаёмствы. І мы, калі даверымся Яму, знойдзем сваё месца ў жыцці ў адпаведнасці з тымі здольнасцямі, якія нам дае Бог», — гаворыць саліст Laudans.
Праз гэтую песню мы хочам заахвоціць кожнага чалавека не баяцца брацца за тое, да чаго ён пакліканы, таму што Бог заўсёды дапаможа.
Сюжэт кліпа Андрэй Лугін і Алёна Палачанская прыдумалі разам. Ідэю абдумвалі ў дарозе падчас гастроляў, а акцёраў знайшлі даволі хутка.
«Гэта былі нашыя сябры — Валерыя Бакурская, Сяргей Ламачэўскі і Вікторыя Чаплева. Маленькую дзяўчынку іграла Аліса Савасцюк. Рэжысёр — Ганна Трус, аператар — Аляксандр Бондараў. У апошніх эпізодах выкарыстоўваецца карціна, намаляваная Аксанай Ючкавіч», — распавёў Андрэй.
На здымкі музычнага роліка ў каманды пайшло тры дні. Кліп Laudans «Воблака» можна паглядзець на афіцыйным Youtube-канале гурта.
Сачыце за творчасцю гурта Laudans у сацсетках
Youtube, Укантакце, Facebook
Марына Валасар
Фота з архіва гурта Laudans
