Старшыня Камісіі па справах фармацыі семінарыстаў і святароў пры Канферэнцыі Каталіцкіх Біскупаў у Беларусі біскуп Аляксандр Яшэўскі SDB заахвочвае вернікаў працягваць духоўную ўспамогу святарскіх і манаскіх пакліканняў у нашай краіне.
Год таму, у нядзелю Хрыста Валадара сусвету, па прапанове каталіцкіх біскупаў Беларусі ў нашым Касцёле распачалася дабравольная ініцыятыва «Духоўная ўспамога святарскіх і манаскіх пакліканняў». Яе мэта ў тым, каб у нашай краіне заўсёды хапала «работнікаў жніва Пана» — святых, мужных і непахісных у веры. Ад шчырага сэрца хочацца падзякаваць усім, хто далучыўся да малітвы аб пакліканнях да святарскага і кансэкраванага жыцця.
Разумеючы дзейснасць малітвы, хочацца і ў гэтым годзе запрасіць усіх ахвотных далучыцца да гэтай ініцыятывы, такой неабходнай і актуальнай.
Яе сутнасць у тым, каб дабравольна прыняць на сябе абавязак на працягу 3 месяцаў, 6 месяцаў ці 1 года (па жаданні):
- маліцца кожны дзень таямніцу Святога Ружанца «Спасланне Духа Святога» ў інтэнцыі новых святарскiх i манаскіх паклiканняў у Беларусі;
- прынамсі раз на месяц удзельнічаць у Эўхарыстыі і ахвяроўваць святую Камунію ў інтэнцыі новых святарскiх i манаскіх паклiканняў у Беларусі;
- чытаць штодзённую малiтву аб святарскiх i манаскіх паклiканнях у Беларусі.
У кантэксце Сіноду Біскупаў на тэму сінадальнасці, нам усім варта пераасэнсаваць сваю адказнасць за будучыню Касцёла, асабліва ў нашай Беларусі, і прысвяціць Пану Богу больш часу на малітву, дбаючы пра пакліканні ў нашых парафіях і асабліва ў сем’ях. Дзякуючы шматлікім і святым пакліканням да святарскага і кансэкраванага жыцця Валадарства Божае ў нашай Краіне будзе пашырацца і расці.
На справу «Духоўнай успамогі святарскіх і манаскіх пакліканняў у Беларусі» ад усяго сэрца благаслаўляю.
Біскуп Аляксандр Яшэўскі SDB
Старшыня Камісіі па справах фармацыі семінарыстаў і святароў
пры Канферэнцыі Каталіцкіх Біскупаў у Беларусі
Паводле: catholic.by.
Абяцанне Духоўнай успамогі пакліканняў
да святарскага і манаскага жыцця ў Беларусі
Я, ……………………………………………, удзельнік Духоўнай успамогі пакліканняў да святарскага і манаскага жыцця ў Беларусі, ва ўрачыстасць Пана нашага Езуса Хрыста, Валадара сусвету, дабравольна бяру на сябе абавязак, каб на працягу (трох месяцаў, шасці месяцаў, аднаго года — па жаданні):
- маліцца кожны дзень таямніцу Святога Ружанца «Спасланне Духа Святога» ў інтэнцыі новых святарскiх i законных паклiканняў у Беларусі;
- удзельнічаць у Эўхарыстыі і ахвяроўваць святую Камунію ў інтэнцыі новых святарскiх i законных паклiканняў у Беларусі (хаця б адзін раз у месяц);
- чытаць штодзённую малiтву аб святарскiх i законных паклiканнях у Беларусі, якую прачытаю сёння першы раз.
Штодзённая малiтва аб святарскiх i законных паклiканнях у Беларусі
Пане Езу Хрыстэ, Найвышэйшы Божы Пастыр! Ты паклiкаў Апосталаў i ўчынiў iх вестунамi Добрай Навiны, схiлi да сябе гарачыя i высакародныя сэрцы маладых людзей Беларусі, учынi iх сваiмi паслядоўнiкамi.
Учынi, каб яны падзялялi Тваё жаданне паўсюднага збаўлення, адгукаліся на маленнi братоў i сясцёр усяго свету аб дары веры i ўзаемнай любовi. Адказваючы на Твой заклiк, няхай яны працягваюць мiсiю ўзрастання Касцёла i стануць соллю зямлi.
Твой мiласцiвы позірк звярнi на сэрцы дзяўчат, чыстых i велiкадушных. Адары iх палымяным імкненнем да евангельскай дасканаласцi, да пасвячэння справам Касцёла i Евангелля i чынення дабра ўсім людзям.
Каралева Беларусі i Мацi Касцёла, вазьмi ў свaе рукi маю малiтву аб шматлiкiх i годных святарскiх i законных паклiканнях. Прадстаў iх Сыну свайму, Езусу Хрысту, нашаму Пану. Якi жыве i валадарыць з Богам Айцом у еднасцi Духа Святога, Бог, праз усе вякi вечныя. Амэн.
