Пад апекаю Беззаганнай. Па старонках снежаньскага нумара часопіса «Ave Maria»

Бог уцелавіўся на зямлі больш за дзве тысячы гадоў менавіта ў сям’і. Гэтым самым Ён паказаў нам найвялікшую каштоўнасць сямейнага асяродка любові, прыняцця, прабачэння і ўзаемападтрымкі. Менавіта па гэтай прычыне апошні ў гэтым годзе, дванаццаты нумар часопіса «Ave Maria», які прыйдзе да чытачоў у часе Адвэнту, прысвечаны сямейным каштоўнасцям і дару жыцця.

«Бацькі павінны старацца, каб сям’я была малым Касцёлам, дзе шануюць Бога», — сказаў святы Аўгустын. Гэтаю думкаю прасякнуты многія публікацыі снежаньскага нумара і з гэтага выслоўя распачаў таксама свае разважанні айцец Юрый Кулай OCD пра першае «памяшканне» Бога на зямлі і першае «жытло» кожнага чалавека — улонне жанчыны-маці, асвячанае Богам, пра што нагадвае нам час Адвэнту і ўрачыстасць Божага Нараджэння (артыкул «Благаслаўлёнае ўлонне»). Ксёндз Андрэй Рылка ў публікацыі «Чаму Марыя Беззаганна Зачатая?» распавядае пра сутнасць догмату Беззаганнага Зачацця, зацверджанага 170 гадоў таму, і пра яго вялікае значэнне ў каталіцкай традыцыі. На гэтую тэму разважае таксама айцец Канстанцін Анашка MIC у артыкуле «Пад апекаю Беззаганнай».

Глыбокія сведчанні пра будаванне сям’і паводле хрысціянскіх прынцыпаў, перажыванне радасці і болю з Езусам Хрыстом чытачы знойдуць у публікацыях «Поўныя любові, радасці, цеплыні і святла» (інтэрв’ю Іны Бігель з сям’ёю Гесць) і «Праз цярпенні — да Бога» (Галіна Калевіч распавядае пра сям’ю Цалко).

Паліна Грыб у артыкуле «Божы дар для сужэнцаў, адзін для дваіх» шчыра дзеліцца сваімі думкамі пра цяжкасці, з якімі сутыкаецца сучасны малады католік у перажыванні сексуальнай сферы свайго жыцця. Тым часам у разважаннях айца Яцака Салія ОР пад загалоўкам «Якая Касцёлу справа?» (артыкул публікуецца ў перакладзе з польскай мовы на беларускую) уздымаецца важнае пытанне пра тое, чаму Касцёл падрабязна гаворыць пра сексуальную этыку і прынцыпы сужэнскага жыцця, хоць на першы погляд здаецца, што гэта прыватная сфера кожнага чалавека.

Чытачоў чакаюць таксама іншыя цікавыя матэрыялы ў рубрыках «Старонка псіхолага», «Нам пішуць», рэпартажы і сведчанні, верш Караля Вайтылы (у перакладзе на беларускую мову Крыстыны Лялько), вершы нашых вядомых паэтак Дануты Бічэль і Ірыны Багдановіч, а на апошніх старонках вокладкі — «Малітвы за сям’ю».

Ганна Шаўчэнка

Набыць часопіс можна:

  • у парафіяльных кіёсках і пробашчаў парафій;
  • у кіёску архікатэдральнага касцёла ў Мінску.

Мы вельмі радыя
бачыць вас на сайце
часопіса «Ave Maria».
Гэта плён працы
неабыякавых людзей,
якія з радасцю ствараюць
гэты часопіс для вас.

Падпіска
Ахвяраванні

Сайт часопіса „Ave Maria“ Мінска-Магілёўскай архідыяцэзіі Рыма-каталіцкага Касцёла ў Беларусі

Часопіс існуе дзякуючы вашым ахвяраванням. Сёння мы просім вашай дапамогі — нават невялікая сума падтрымае нас.

Падрабязней