Выхоўваць з любоўю

Як фарміруюцца нашыя погляды на маральныя і рэлігійныя каштоўнасці? Адкуль мы чэрпаем досвед, які датычыць выхавання дзяцей? Якія людзі мацней за ўсё ўплываюць на гэтыя духоўныя і псіхалагічныя ўстаноўкі? Адказам на гэтыя і шматлікія іншыя пытанні прысвечана кніга ксяндза прэлата Андрэя Стэцкевіча «Выхоўваць з любоўю», якая нядаўна пабачыла свет у выдавецтве «Про Хрысто».

Аўтар кнігі, нараджэнец Гродна, атрымаў адукацыю ў Люблінскім каталіцкім універсітэце на факультэце псіхалогіі, вучыўся ў Акадэміі каталіцкай тэалогіі ў Інстытуце тэалогіі сужэнства і сям’і ў Варшаве, там жа абараніў доктарскую дысертацыю. Ён з’яўляецца заснавальнікам сямейных цэнтраў для падрыхтоўкі да сакрамэнту сужэнства, дапамогі сем’ям, якія перажываюць крызіс, а таксама для абароны жыцця ад зачацця да натуральнай смерці.

У сваёй кнізе ксёндз прэлат Андрэй Стэцкевіч разглядае фактары, якія ўплываюць на выхаваўчы працэс у сям’і, асаблівую ўвагу звяртаючы на перадачу выхаваўчых установак ад аднаго пакалення да другога. Аўтар таксама аналізуе сістэму адносінаў паміж рознымі членамі сям’і і паказвае, якое значэнне ў выхаванні дзяцей маюць стасункі паміж сужэнцамі, паміж іншымі дзецьмі ў сям’і, які ўплыў на выхаванне аказваюць бабулі і дзядулі.

Асобныя раздзелы кнігі прысвечаны маральнаму і рэлігійнаму ўздзеянню на дзяцей такіх выхаваўчых асяродкаў, як школа і Касцёл, а таксама сродкаў масавай камунікацыі. Як адзначыў у прадмове да кнігі мітрапаліт Тадэвуш Кандрусевіч, «пакуль дэвальвацыя сямейных каштоўнасцяў не знішчыла нас, неабходна вельмі сур’ёзна аднесціся да праблемаў сям’і». Таму кніга ксяндза прэлата Андрэя Стэцкевіча вельмі актуальная ў наш час, і стане крыніцаю карыснай інфармацыі для ўсіх, хто задзейнічаны ў выхаванні наступных пакаленняў — бацькоў, выхавацеляў, настаўнікаў, катэхетаў.

Ганна Шаўчэнка

Мы вельмі радыя
бачыць вас на сайце
часопіса «Ave Maria».
Гэта плён працы
неабыякавых людзей,
якія з радасцю ствараюць
гэты часопіс для вас.

Падпіска
Ахвяраванні

Сайт часопіса „Ave Maria“ Мінска-Магілёўскай архідыяцэзіі Рыма-каталіцкага Касцёла ў Беларусі

Часопіс існуе дзякуючы вашым ахвяраванням. Сёння мы просім вашай дапамогі — нават невялікая сума падтрымае нас.

Падрабязней