У новым нумары часопіса «Наша вера» (№ 3, 2025) чытачы знойдуць цікавыя матэрыялы, прысвечаныя важным падзеям з жыцця Касцёла, у тым ліку пачатку Пантыфікату Папы Льва XIV, пераклады духоўнай літаратуры, паэзію і прозу сучасных беларускіх аўтараў, артыкулы пра беларускае сакральнае мастацтва, рэлігійнае жыццё мінуўшчыны і сучаснасці.
Гэты нумар часопіса пачынаецца прамоваю Святога Айца Льва XIV да прадстаўнікоў масмедыя ў Ватыкане 12 мая 2025 г.
Асобе Папы Льва XIV прысвечаны матэрыял Элы Дзвінскай «Перуанцы вітаюць новага Папу Льва і ганарацца сяброўствам з ім».
У рубрыцы «Пераклады» Аксана Данільчык прапануе ўвазе чытачоў свой пераклад з італьянскай мовы «Разважанняў аб святых стыгматах святога Францішка» (працяг).
У рубрыцы «Асобы» друкуецца ўрывак з кнігі «Патрабавальны Папа» польскага святара, тэолага і публіцыста кс. Робэрта Скшыпчака ў перакладзе Крыстыны Лялько (працяг).
Кс. д-р Юрый Дрозд у артыкуле «Першы Сусветны Сабор у Нікеі ў кантэксце эпохі і веры Касцёла» апавядае пра гэтую эпахальную падзею.
Шляхетнай каталіцкай сям’і Котвічаў прысвечаны артыкул кандыдата гістарычных навук, знаўцы архітэктуры Анатоля Сцебуракі «Капліца-пахавальня роду Котвічаў у Міхалішках».
Рэстаўратар Ігар Сурмачэўскі ў артыкуле «Будслаў і род Слізняў у XVI–XVIII стагоддзях» апавядае пра сакральнае паяднанне лёсу шляхетнага роду Слізняў з гісторыяй будслаўскага касцёла (працяг).
У рубрыцы «Паэзія» друкуюцца вершы Алеся Дуброўскага-Сарочанкава і Ірыны Саматой.
210-годдзю з дня нараджэння Габрыэлі Пузыні прысвечана публікацыя, падрыхтаваная літаратуразнаўцаю Ірынай Багдановіч. Тут жа друкуюцца ўспаміны пра Габрыэлю Пузыню Антонія Эдварда Адынца, які добра ведаў паэтку.
У рубрыцы «Пераклады» друкуецца проза Георга Освальда Котта ў перакладзе з нямецкай мовы Алены Сямёнавай-Герцаг.
Мастацтвазнаўца Таццяна Гаранская (Таня Плынь) прапануе ўвазе чытачоў сваё даследчыцкае эсэ «Ксенія Брачыславава. Рэканструкцыя жыцця і дзейнасці Ізяслаўскай князёўны».
У рубрыцы «Мастацтва» друкуецца артыкул мастацтвазнаўцы Надзеі Усавай «„Жніво“, або Духоўная вандроўка Міхася Сеўрука», прысвечаны 120-годдзю з дня нараджэння аднаго з найсамабытнейшых мастакоў Заходняй Беларусі.
Музеязнаўца, экскурсавод Вераніка Шэмет-Рэмізевіч у эсэ «Падарожжа ў Таледа» апавядае пра веліч духу мастацтва і архітэктуры старажытнай сталіцы Іспаніі, дзе нядаўна экспанавалася мастацкая калекцыя пад назваю «Аблічча Хрыста». Гэтай жа калекцыі прысвечаны артыкул Валянціна Глекава «У сучасных мастацкіх пошуках Аблічча Хрыста».
Стах Лысы і Ян Лысы ў артыкуле «„Дэкалог“ Кшыштафа Кеслёўскага» разважаюць пра адметнае прачытанне Божых запаведзяў сусветна вядомым творцам кіно (працяг).
