Дарагія чытачы, ужо зусім хутка ў Касцёле распачынаецца Адвэнт — час засяроджанасці і радаснага чакання нараджэння Збаўцы Езуса Хрыста. З гэтай нагоды ў апошнім, лістападаўскім, нумары часопіса «Ave Maria» мы змясцілі для вас адвэнтавы каляндар - 2021.

Адвэнтавы каляндар — гэта добрая традыцыя рабіць у кожны дзень Адвэнту пэўнае заданне, а часам нават атрымліваць за гэта падарунак. Звычайна такія календары рыхтуюць бацькі для сваіх дзяцей, прыдумваюць для іх заданні, далучаюць у скрыначку ці пакуначак невялікі падарунак (напрыклад, нешта салодкае) і афармляюць усё гэта ў прыгожую кампазіцыю.

Але гэты атрыбут Адвэнту можа стаць выдатнай дапамогаю працы над сабою не толькі для дзяцей, але і для дарослых. Таму мы падрыхтавалі для вас «дарослыя» заданні ў нашым апошнім нумары часопіса. Можна павесіць іх на сцяну, а можна нарэзаць сабе заданняў і змясціць іх у зроблены ўласнымі рукамі каляндар.

Запрашаем разам з намі ўвайсці ў гэтую адвэнтавую прыгоду, бо мы будзем гэтыя заданні таксама публікаваць штодня ў нашых сацсетках.

Падрыхтавала Вольга Адамовіч