Да святочнага стала

Сярод прыемных клопатаў напярэдадні ўрачыстасці Уваскрасення Пана звычайна важнае месца адводзіцца сямейнаму велікоднаму пасілку. Прапануем вам, дарагія чытачы, некалькі рэцэптаў, якімі можна разнастаіць святочны стол. Згадаем, што аўтару дадзеных рэцэптаў, Марыне Новікавай, належыць таксама кніга «Пасхальный стол» («Конфидо», 2010 г.), а цяпер у выдавецтве «Pro Сhristo» рыхтуецца новы зборнік яе рэцэптаў велікодных страваў.

Велікодны куліч

Для цеста (на 1 сярэдні і 4 маленькія кулічы або на 2 сярэднія кулічы): 5–6 шклянак (600–700 г) мукі; паўтары шклянкі малака, 4–5 жаўткоў, паўтары шклянкі цукру, 200 г сметанковага масла, 50–60 свежых ці 2 ст.л. сухіх дражджэй, 1 лыжачка солі; 1 пакецік ванільнага цукру ці 1 лыжачка ванільнага экстракту, 1 шклянка сумесі зацукраванай апельсінавай скуркі, цукатаў, міндалю, разынак ( або сушаных чарніцаў ці чорных парэчак замест разынак), можна таксама дадаць паўлыжачкі шафрану, 2–3 ст.л. каньяку, рому, гарэлкі.

Для глазуры: 2–3 бялкі, каля 1 шклянкі цукру ці цукровай пудры, 1–2 ст.л. лімоннага соку.
1. Калі выкарыстоўваецца шафран, то яго трэба расцерці ў ступцы, заліць 2–3 ст.л. гарачай вады ці алкаголю, настаяць 15–30 хвілін.

2. У цёплым малацэ развесці дрожджы, змяшаць з 2 ст.л. цукру і 2 шклянкамі мукі, на паверхню пасыпаць крыху прасеянай мукі і паставіць у цёплае месца на 20–30 хвілін.

3. Жаўткі расцерці з цукрам. Дадаць алкаголь (тады куліч будзе больш рассыпістым і даўжэй захаваецца), дадаць цеста, уліць шафран і ваніль, змяшаць. Дадаць паступова, па замесе, 2–3 шклянкі мукі і яшчэ раз замясіць цеста, дадаючы растопленае сметанковае масла (добра замешанае цеста не павінна прыліпаць да рук). Прыкрыць цеста вільготным ручніком або харчовай плёнкай і пакінуць у вельмі цёплым месцы на 1–3 гадзіны. Абмяць цеста, пры неабходнасці дадаць яшчэ мукі і даць цесту яшчэ раз падысці. Дадаць арэхі і сухафрукты і зноў даць цесту падрасці. Замешваць цеста можна некалькі разоў.

4. Форму для выпечкі змазаць алеем або сметанковым маслам. Пакласці цеста ў форму, запоўніўшы яе напалову, і даць цесту яшчэ раз падняцца. Верх можна змазаць яйкам, змешаным з 1 ст.л. вады і 1 ст.л. цукру. Выпякаць да залацістага колеру ў нагрэтай да 180 градусаў духоўцы 35–55 хв. (у залежнасці ад памеру куліча). Пасля таго, як верх падрумяніцца, на куліч можна па­класці фольгу, каб ён не падгараў. Для таго, каб куліч не быў занадта сухі і не падгарэў знізу, на дно духоўкі можна паставіць посуд з вадой.

5. Гатовы гарачы куліч можна пакрыць глазурай з бялкоў, узбітых з цукрам ці цукровай пудрай з лімонным сокам.

Пры жаданні верх куліча можна ўпрыгожыць марцыпанам.


Рулецікі з цяляціны з амлетам

На 4-6 порцый: 500 г цяляціны, 150 г тоўстых скрылікаў шынкі (пажадана цёмнай, для кантрасту), 2 яйкі, 1 пучок кропу, 2 ст. лыжкі малака, 1/3 шклянкі сухога белага віна ці булёну, соль, перац па гусце.

1. Яйкі ўзбіць з малаком і кропам, дадаць соль і перац. На патэльню з алеем выліць сумесь, смажыць 3-4 хвіліны, затым перавярнуць і смажыць яшчэ столькі ж. Зняць амлет з патэльні.

2. Нарэзаць цяляціну тонкімі скрылікамі, злёгку адбіць. Выкласці мяса на дошку так, каб кавалачкі заходзілі адзін на адзін, пасыпаць соллю і перцам.

3. Пакласці на адбітую цяляціну скрылікі шынкі, затым амлет і скруціць рулет (лішні край амлету абрэзаць па форме паласы рулета).

4. Пакласці рулет на фольгу, скрапіць алеем, паліць віном ці булёнам і добра зашчыпнуць край фольгі.

Выпякаць у духоўцы пры 180 градусах каля 40 хвілін.

Карысная парада: каб амлет лягчэй было перавярнуць, можна акуратна ссунуць яго з патэльні на талерку, накрыць зверху другой талеркай, перавярнуць і ссунуць амлет зноў на патэльню.


Кілбаскі, запечаныя ў гаршчочку

На 4 порцыі: 500 г невялікіх сырых кілбасак, 250 г вэнджаных кілбасак, 500 г невялікай морквы (можна замарожанай), 500 г маладой бульбы, 500 г маладой капусты, 1-2 яблыкі, 2 зубкі часнаку, 2 лыжачкі сушанага маярану, 1 лыжачка молатай каляндры, зялёны кроп, 1 шклянка сухога белага віна, па 3-4 ст.л. алею і сметанковага масла, соль, перац.

1. На алеі, змешаным са сметанковым маслам, абсмажыць моркву і бульбу (5–8 хв.), дадаць соль, перац, палову прыправы і здробненага часнаку. Асобна абсмажыць з рэшткаю прыправы нарэзаную на квадрацікі капусту. Калі кілбаскі вялікія, іх трэба парэзаць, падрумяніць на алеі, змяшаць з моркваю, бульбаю і нарэзанымі вэнджанымі кілбаскамі.

2. Яблыкі абабраць, нарэзаць кружкамі, выразаць сярэдзіну. Дно гаршчочкаў або іншага вогнетрывалага посуду выслаць яблыкамі і пакласці на іх слой капусты. Зверху пакласці слой гародніны з кілбаскамі і заліць віном, разведзеным 1 шклянкаю вады. Запякаць 20-30 хв. у нагрэтай да 200 градусаў духоўцы. Перад тым, як падаць на стол, пасыпаць зялёным кропам.


Падрыхтавала Марына Новікава  

Мы вельмі радыя
бачыць вас на сайце
часопіса «Ave Maria».
Гэта плён працы
неабыякавых людзей,
якія з радасцю ствараюць
гэты часопіс для вас.

Падпіска
Ахвяраванні

Сайт часопіса „Ave Maria“ Мінска-Магілёўскай архідыяцэзіі Рыма-каталіцкага Касцёла ў Беларусі

Часопіс існуе дзякуючы вашым ахвяраванням. Сёння мы просім вашай дапамогі — нават невялікая сума падтрымае нас.

Падрабязней