Выдавецтва «Про Хрысто» прэзентуе чарговую кнігу пра жыццё былога біскупа Пінскай дыяцэзіі слугі Божага Зыгмунта Лазінскага (1870–1932), прыадкрываючы перад чытачом новую таямніцу яго веры і паказваючы яго як адданага пастыра і проста Божага чалавека. Гэтаю таямніцаю было цярпенне, якое біскуп Лазінскі яшчэ як малады святар навучыўся прымаць і ахвяраваць Пану, ва ўсім бачачы Божую волю.

Аўтар кнігі кс. доктар Станіслаў Паўліна fDP, былы кусташ грабніцы слугі Божага біскупа Лазінскага ў пінскай катэдральнай базыліцы, пашырае культ слугі Божага сярод вернікаў і ў гэтай кнізе знаёміць чытача з асобаю біскупа Зыгмунта Лазінскага праз факты яго біяграфіі, прасякнутыя цярпеннем. Значную частку выдання складае пісьмовая спадчына слугі Божага — урыўкі з яго кнігаў і пастырскіх пасланняў, якія дапамаюць нам адкрыць сэнс хрысціянскага цярпення і важнасць «дачынення да таго, што перанёс Хрыстус Пан дзеля нашага адкуплення». Хто з нас не спазнае несправядлівасці і болю ў сваім жыцці? Прыклад слугі Божага Зыгмунта Лазінскага вучыць нас глядзець на ўзвышаны над зямлёю Хрыстовы крыж, у якім мы знойдзем дасканалую радасць: «Дай мне Тваё святло, Ойча мой наймілейшы, каб я бачыў шлях, якім павінен ісці, ніколі не сыходзіў з яго і быў здольны накіроўваць іншых».

Слуга Божы Зыгмунт Лазінскі, у паўнаце пазнаўшы людскую немач, быў і застаецца верным заступнікам грэшнага чалавека. Дазволім жа і мы яму быць нашым сябрам з вечнасці, каб гэты прарок быў прыняты на сваёй Бацькаўшчыне.    

Дар’я Ахламёнак

Набыць кнігу можна:

• у кнігарні «Духоўная кніга» (г. Мінск, вул. Багдановіча, 25, пн–пт: 11.00–18.00);
• у парафіяльных кіёсках і пробашчаў парафій;
• альбо звяртайцеся ў рэдакцыю па тэл. (017) 293 17 50.