«Не застанецца каменя на камені…»

Трыццаць трэцяя звычайная нядзеля, Год С (17.11.2019)

Калі некаторыя гаварылі пра святыню, што яна ўпрыгожана каштоўнымі камянямі і дарамі, Ён сказаў: «Прыйдуць дні, калі з таго, што вы тут бачыце, не застанецца каменя на камені, які не будзе зруйнаваны». Спыталіся ў Яго: «Настаўнік, калі ж гэта станецца і што будзе знакам, калі гэта павінна адбыцца?» Ён сказаў: «Глядзіце, каб вас не звялі, бо многія прыйдуць пад імем Маім, кажучы, што гэта Я і што наблізіўся час. Не ідзіце за імі. Калі ж пачуеце пра войны і хваляванні, не палохайцеся, бо спачатку гэта павінна адбыцца, але не адразу канец». 

Тады сказаў ім: «Паўстане народ на народ, і каралеўства на каралеўства; будуць вялікія землятрусы, а месцамі голад і мор, жахлівыя з’явы і вялікія знакі з неба. Але перад усім гэтым схопяць вас і будуць пераследаваць, аддаючы ў сінагогі і ў вязніцы, і паставяць перад каралямі і намеснікамі за імя Маё. І будзе гэта вам на сведчанне. Таму пастанавіце ў сэрцы сваім не клапаціцца наперад, як абараніцца, бо Я дам вам мову і мудрасць, якой не здолеюць супрацьстаяць ці супярэчыць праціўнікі вашыя. Выдаваць вас будуць таксама бацькі і браты, родныя і сябры, а некаторых з вас заб’юць. І зненавідзяць вас усе за імя Маё. Але і волас з галавы вашай не прападзе. Цярпеннем сваім уратуеце душы вашыя.

(Лк 21, 5–19)

«Не застанецца каменя на камені…»

Шчаслівага канца не будзе! Прынамсі не будзе такога шчаслівага канца, які мы ўяўляем: з сыходам на захад. Хутчэй гэта будзе выйсце на ўзыход сонца — Хрыста, які прыйдзе ў хвале. Будзе канец, які немагчыма ні апісаць, ні ўявіць. Яго можна толькі чакаць і маліцца.

А як вам святыня, якую паказвалі Езусу? Як вам ўсе яе прыгожыя каштоўныя камяні і дары? Няма іх. Прамінулі, каб хутчэй надышло новае. У гэтым захапленні святыняй чутнае рэха словаў апостала Пятра на гары Перамянення: «Добра нам тут быць» (Лк 9, 33). Трывай хвіліна, няхай усё застанецца, як ёсць! Пазнаеце ў гэтым сучасную «стабільнасць»? Нам добра і прыемна быць, напрыклад, сярод аднадумцаў у сацыяльных сетках, ці аднаверцаў у душпастырстве і няхай усё застанецца без зменаў. Так можа здавацца спачатку, пакуль мы не адкрыем, як нудна жыць без выклікаў. Зусім не трэба шукаць нейкіх незвычайных выпрабаванняў, дастаткова выйсці з зоны стабільнасці, ад якой не робіцца горш, але і не становіцца лепш, і выплыць на глыбіню. Ці не гэта часта паўтарае папа Францішак следам за Езусам?

Калі мы захочам вырушыць, на шляху нам спатрэбіцца ўменне распазнаваць сапраўднага Езуса і правільна чытаць знакі часу, пра што Ён сам гаворыць нам у Евангеллі. І яшчэ — шмат мужнасці. Але гэта ўжо дар Духа Святога, які шчодра адорвае тых, хто шчыра Яго просіць.


Айцец Павел Мажэйка ОР

Мы вельмі радыя
бачыць вас на сайце
часопіса «Ave Maria».
Гэта плён працы
неабыякавых людзей,
якія з радасцю ствараюць
гэты часопіс для вас.

Падпіска
Ахвяраванні

Сайт часопіса „Ave Maria“ Мінска-Магілёўскай архідыяцэзіі Рыма-каталіцкага Касцёла ў Беларусі

Часопіс існуе дзякуючы вашым ахвяраванням. Сёння мы просім вашай дапамогі — нават невялікая сума падтрымае нас.

Падрабязней