З нагоды агульнабеларускай перэгрынацыі рэліквій святой Тэрэзы ад Дзіцяткі Езуса ў выдавецтве «Pro Christo» падрыхтаваны малітоўнік «Маё пакліканне — гэта любоў», які ўяўляе сабой пераклад польскага выдання «Z ufnoscia i miloscia. Modlmy sie ze swieta Teresa od Dzieciatka Jezus» (Krakow, 2005).

Кніга адметная тым, што ў ёй не толькі пададзеныя тэксты малітваў, але і прапануюцца глыбокія духоўныя разважанні. За аснову гэтых разважанняў узятыя афарыстычныя ўрыўкі з твораў святой Тэрэзы, з яе рукапісаў і лістоў.  Такім чынам пабудаваныя:
• «Ружанец Найсвяцейшай Панны Марыі»;
• «Крыжовы шлях са святою Тэрэзаю ад Дзіцяткі Езуса», «Крыжовы шлях любові і даверу»;
• «Навэнна аб пазнанні і захаванні галоўных праўдаў веры», навэнна «Духоўная падрыхтоўка да прысвячэння сябе Міласэрнай Любові».

У малітоўнік таксама ўключаныя 3 тэксты літаній да святой Тэрэзы; малітвы, складзеныя ёю, і малітвы, звернутыя да яе. Гэтае выданне не толькі дапаможа падрыхтавацца і глыбока перажыць перэгрынацыю рэліквій святой Тэрэзы па парафіях Беларусі, але і дапаможа цярпліва ставіцца да выпрабаванняў, любіць прыніжэнне і ўласную мізэрнасць — адным словам, адкрые душы «малы шлях» гэтай святой, які вядзе да вялікай любові.

З глыбокім болем прыняла вестку пра смерць кардынала Казіміра Свёнтка акцыя салідарнасці нямецкіх католікаў «Renovabis». «Гэты святар быў сапраўдным сведкам веры для беларускіх хрысціянаў», — піша ў спачувальным лісце выканаўчы дырэктар «Renovabis» доктар Герхард Альберт.

Дырэктар «Renovabis» падкрэсліў, што кардынал Свёнтэк зрабіў вялікі ўклад у адраджэнне Касцёла ў сваёй краіне, а сваім прыкладам падбадзёрваў землякоў. З 1995 г. ён рэалізаваў у Беларусі больш за 260 душпастырскіх праектаў пры фінансавай падтрымцы «Renovabis».

Па словах Герхарда Альберта, кардынал Свёнтэк заўсёды быў сціплай асобай і кіраваўся словамі св. Паўла: там, дзе пануе дух Божы, ёсць і свабода. «Бог стварыў людзей свабоднымі, і няма нічога больш каштоўнага, чым свабода!» — прыводзяцца ў спачувальным лісце словы святой памяці кардынала, якія добра адлюстроўваюць яго стаўленне да жыцця. Як адзначае Герхард Альберт, свабода і рашучае «не» для зла і «так» для дабра былі галоўнымі прынцыпамі ў паводзінах памерлага іерарха.

Паводле catholic.by