Любоў і вера — пачуцці, якія не могуць існаваць без узаемадапаўнення. Там, дзе ёсць любоў, заўсёды будзе месца для веры ў светлае, чыстае, прыгожае. Узгадайце. Менавіта гэтай бялюткай чысцінёй былі агорнутыя нашы калядныя думкі, калі кожны марыў пра цуд, веру ў які захаваў у сабе на ўсё астатняе жыццё.
Напэўна, такой у дзяцінстве была і вядомая ў Аўстрыі дзіцячая пісьменніца Ленэ Майер-Скуманц. Чаму? Бо, напэўна, нельга шчыра пісаць для дзяцей і не перажываць той радасці, якая прыходзіла да цябе разам са святам, разам са смакам імбірнага печыва і незабыўным на ўсё жыццё пахам ялінак. Так, у гэтым ёсць і вера, і любоў, і радасць. Шчасцем Божага Нараджэння дзеліцца з намі пісьменніца ў сваіх кароценькіх зімовых гісторыях, сабраных у кнізе «Бэтлеемская зорка», дзе ёсць месца цуду, усмешкам, дзівацтву і нават злосці нявер’я, якое ўсе роўна перамагае вера ў Хрыста, Збаўцу свету. Як бы цяжка ні даводзілася на жыццёвым шляху героям аўтаркі, яны ўсё адно знаходзяць разуменне паміж сабою. Мова дзяцей — універсальная. Таму і не дзіўна, што малыя і гарэзлівыя дзеткі здолелі аб’яднаць вакол сваёй адвэнтавай батлейкі ўвесь пад’езд і нават гатовыя прабачыць невядомую нянавісць заможнага гандляра, які ў свой час мог выратаваць жыццё маці, але не захацеў, і спакойна сябраваць з яго малым. Ці можна ў гэта паверыць? Так, калі забіў такі гнеў у сабе, прабіў шлях для чыстых думак. Не дзіўна, што кожнае апавяданне, кароценькая п’еса заснаваныя на пэўным біблейскім прыкладзе або апокрыфе, што дазваляе малому праз лёгкую чытанку адрозніць добрае ад дрэннага, больш даведацца пра свята Божага Нараджэння. Галоўнае, што чытач бачыць у творах не задуменных дарослых мысляроў, якія шукаюць адказы на рытарычныя пытанні, а сваіх аднагодкаў. Яны праз смешныя дзіцячыя забаўкі чакаюць цуду, таго цуду, у які кожны з нас верыў у дзяцінстве і захаваў на ўсё жыццё.
Добрая, вясёлая кніга — ужо цуд, які робіць нас шчаслівымі, вяртае пасля шэрай будзённасці ўсмешку. Таму спяшайцеся хуценька ў краму выдавецтва «Про Хрысто» і пытайцеся пра кнігу Ленэ Майер-Скуманц. Ззяць шчырасцю і цеплынёй на вашых палічках «Бэтлеемская зорка» будзе доўга — абяцаю. Добрых Калядаў, панове!
Тарас Шчыры
