Данута БІЧЭЛЬ

 

Вялікдзень

 

Так нечакана здараюцца цуды,

таму што Божанька ўсюды!

Нехта на досвітку Езуса ўвідзеў,

Нядзелька была — Вялікдзень.

 

Езус ішоў нацянькі праз балота,

Не таптаў залатую лотаць...

Выйшаў з цямрэчы і не баіцца

смерці-вясніцы...

 

З верай —  як зойдзем, гэтак і выйдзем,

сустрэнем Вялікдзень...

Душамі станем, радасці зернем

з Хрыстовым уваскрасеннем.

 

Разам збярэмся, як ноты да песні,

разам з Табой уваскрэснем...

Цудоўных дзеяў цудоўныя рэчы!

Уваскрос, смерцю смерць знявечыў!

 

Божанька, так мы чакаем Цябе 

і верым, што нас не пакінеш —

самотныя, як каташкі на вярбе,

як галадкі на сцяжыне...

 

Складаем Табе на Крыжовы шлях

малітвы пакутных стацый.

Шукаем Цябе, Уваскрэслага, ў снах,

у вачах немаўлят і старцаў...

 

Вяртанне

 

Вясніца вяртання

ў чыстае цёплае ранне,

у новае Змёртвыхпаўстанне!

 

Пойдзем па вёсцы яечкі збіраць

у чырвоны кошык...

Каго спаткаем, будзем вітаць:

— Хрыстос уваскрос, Сын Божы!

 

Суседзі, цёткі, бабулі —

Малым даюць — хто што можа,

усміхаюцца сціпла, прыгожа...

— Хрыстос уваскрос, Сын Божы!

 

Езус Змёртвыхпаўсталы,

мы Цябе адразу пазналі

у добрых людскіх вачах,

у вуснах, якія маўчаць...

 

У снах з маладога рання,

якое надзею цярусіць...

Ды як не будзе тут Беларусі...

не будзе нам змёртвыхпаўстання...

 

Перасадзі нашу мову,

як расадку на градку...

уваскрасі наша Слова,

якое нам даў ад пачатку...

 

І што будзе потым?..

 

Калі плануюцца мітынгі

на галоўным пляцы, 

лічаць, колькі змяшчаецца

людзей на кожным квадраце...

 

Божа, калі ўсе мы аднойчы

з Табой уваскрэснем,

дзе ж мы паставім столькі лавак і крэслаў,

гэтулькі новых пляцаў, новых нябёсаў?

 

Дошку абвестак павесім ад плоту да плоту,

крэйдай напішам формулу на несмяротнасць

бальзаму, нектару любові...

І што будзе потым?

Будзем цвісці, як рамонкі ў полі?