Сусветныя дні моладзі цудоўныя тым, што можна сустрэць мноства людзей з усіх куткоў зямлі, якія прыязджаюць, каб дзяліцца адзін з адным і з усім светам досведам сваёй веры, досведам маладосці, якая пражываецца разам з Хрыстом, а таксама радасцю, якая напаўняе іх сэрцы.
Для тых, хто не змог пабываць у Кракаве ў летнія дні напрыканцы ліпеня, Юлія Шэдзько зрабіла спецыяльны рэпартаж з Campus Misericordiae, поля Міласэрнасці, дзе моладзь з усіх частак свету сабралася разам на малітоўнае чуванне. Для вас прагучаць іх галасы — галасы Сусветных дзён моладзі.
Завяршаючы падарожжа, мы пазнаёмімся, напэўна, з адной з самых цікавых групаў пілігрымаў, што прыехалі на СДМ — з міжнароднай групай з Расіі. Цікава бачыць, як збіраюцца разам і па-сапраўднаму сябруюць людзі не проста з розных краінаў, а з розных кантынентаў! Гэта як адна з мэтаў саміх СДМ — на практыцы вучыцца быць адным Хрыстовым Целам, нягледзячы на тое, якія мы ўсе розныя.
Расія-Конга-Эквадор-Грузія
Юлія: Назавіцеся, калі ласка, і раскажыце, адкуль вы.
— Мяне завуць Летысія, я з Конга.
— Мяне завуць Майра, я з Эквадора.
— Мяне завуць Люба, я з Грузіі.
Юлія: Файна! А як атрымалася, што вы ўсе размаўляеце па-руску?
Летысія: Я вучуся на медыцынскім факультэце ў Саратаве, пераходжу на пяты курс.
Майра: Я вывучаю анкалогію, таксама ў Саратаве.
Люба: А я працую ў Расіі. Я кандытар. Ва ўсіх нас у групе розныя прафесіі.
Юлія: Гэта проста цудоўна! І ўсе вы жывеце цяпер у Саратаве?
Люба: Я жыву ў Пензе, а прыехала з саратаўскай групай.
Юлія: Зразумела. А вы першы раз на СДМ і сустрэчы з Папам?
Летысія і Майра: Так, упершыню!
Люба: А я ўжо ў трэці раз, яшчэ я была ў Рыо і ў Кёльне.
Юлія: Файна! Падзяліцеся, калі ласка, сваімі ўражаннямі аб сустрэчы.
Люба: Сустрэча нам вельмі спадабалася, Польшча вельмі прыгожая краіна, раней мы тут не былі. Мы наведалі шмат месцаўі, уся нашая група ў захапленні. Тут вельмі шмат пілігрымаў, нам гэта вельмі падабаецца як каталіцкай моладзі, што прыехала на СДМ.
Майра: Усё вельмі спадабалася, вельмі шмат моладзі. Вельмі шмат краінаў. Моладзь з усяго свету сабралася разам у адным месцы, каб маліцца і праслаўляць Пана Бога, і гэта цудоўная магчымасць усім памаліцца ў адной інтэнцыі — аб супакоі ў свеце.
Летысія: Мы вельмі шчаслівыя быць тут, разам са столькімі людзьмі з розных краінаў. Мы першы раз на сустрэчы з Папам. Усе радасныя, усе моляцца, і гэта шчасце — быць тут.
Юлія: Дзякуй вам! Перадайце, калі ласка, прывітанне для Беларусі!
