З першых старонак лістападаўскага нумара часопіса «Ave Maria» чытач зможа акунуцца ў атмасферу працы 14-га Звычайнага Сінода Біскупаў, які адбыўся ў Рыме 4–25 кастрычніка і быў прысвечаны тэме «Пакліканне і місія сям’і ў сучасным свеце». Удзельнік Сінода, арцыбіскуп Тадэвуш Кандрусевіч, распавядае пра тое, якія пытанні дамінавалі на пасяджэннях, і дае адказ на многія супярэчлівыя меркаванні, што прагучалі ў сувязі з тэматыкай Сінода ў ліберальных сродках масавай інфармацыі. Асабліва гэта датычыць дапушчэння да Камуніі разведзеных і тых, хто зноў уступіў у грамадзянскі саюз, а таксама прызнання Касцёлам аднаполых саюзаў.

Разам з айцом місіянерам Станіславам Аўгустынам, рэдэмптарыстам, чытачы змогуць адправіцца ў «віртуальнае» падарожжа па Балівіі — краіне, пра якую распавядаецца ў артыкуле «Місіянерскі досвед». Айцец Станіслаў, правёўшы там ужо трыццаць пяць гадоў, дзеліцца з намі цікавымі ўспамінамі пра самыя яркія моманты свайго служэння.

«Сімвал перамогі над смерцю» — у артыкуле пад такою назваю Ірына Жарнасек распавядае пра незвычайнае свята, якое адбылося ў Росіцы на пачатку кастрычніка, — свята кветак. Чытаючы пра ўражанні нашай аўтаркі, нясцерпна хочацца на свае вочы ўбачыць гэтыя плантацыі вяргіняў вакол росіцкага касцёла і шчодрую квецень вакол маленькіх вадаёмаў, створаных клапатлівымі рукамі айца Часлава Курэчкі. Кажуць, у кожнага чалавека павінна быць справа душы… А вынікі «кветкавай» справы айца Часлава прамаўляюць да сэрца кожнага мінака, заклікаюць задумацца пра вечнае і імгненнае, пра жыццё і паміранне…

Акрамя гэтых матэрыялаў, чытачоў чакаюць цікавыя публікацыі ў рубрыках «Школа малітвы», «Старонка псіхолага», «Год кансэкраванага жыцця», «Інтэрв’ю» і «Сведчанне». А малітоўную капілку вернікаў папоўняць малітвы да святой Кацярыны Александрыйскай, змешчаныя на апошніх старонках лістападаўскага нумара часопіса.