Дарагія чытачы, цяпер, калі нашая Бацькаўшчына і наш беларускі народ мае вялікую патрэбу ў Божай прысутнасці, у малітве, прапануем вашай увазе набажэнства перапрашэння, якое дапаможа ў вашых малітвах за беларусаў, жывых і памерлых, асабліва цяпер, напярэдадні дня ўсіх памерлых вернікаў і актавы малітвы за памерлых.

Набажэнства перапрашэння

Уваскрослы Хрыстэ, у гэтай малітве просім у Цябе прабачэння за зло і грахі, якія ўчыніў наш беларускі народ. Становімся перад Табою на калені ў праслаўленні і пакоры. Падчас гэтай малітвы прагнем дакрануцца да кожнай раны, якую мы самі і папярэднія пакаленні нанеслі Твайму Найсвяцейшаму Сэрцу і Касцёлу ў нашай Айчыне. 

Можна прачытаць урывак са Святога Пісання: Дан 9, 3–20. 

Перапрашэнне за знявагу святыняў

С.: Увайшоўшы ў святыню, Ён пачаў выганяць гандляроў, кажучы ім: «Напісана: „Дом Мой — гэта дом малітвы“, а вы зрабілі з яго пячору разбойнікаў» (Лк 19, 45–46).

Міласэрны Езу, просім прабачэння за грахі, учыненыя нашымі продкамі ў эпоху ваяўнічага атэізму. Асаблівым чынам хочам перапрасіць Цябе за знявагу і знішчэнне месцаў Твайго культу на тэрыторыі нашай Айчыны. Прабач нас за тое, што наш народ дапусціў гэтае зло.

Пасля кожнага закліку адказваем: Езу Міласэрны, змілуйся над намі,

— за ўсе замкнёныя святыні,
Н.: Езу Міласэрны, змілуйся над намі,

• за касцёлы і капліцы, ператвораныя ў склады, фабрыкі і заводы, спартыўныя залі, кінатэатры і канцэртныя залі,
• за разбураныя касцёлы,
• за пакінутыя і занядбаныя святыні, якія стаяць у руінах,
• за знявагу нашых парафіяльных святыняў,
• за знявагу і знішчэнне могілкаў,
• за знявагу святых абразоў,
• за знявагу Найсвяцейшага Сакрамэнту,
• за людзей, якія знішчылі святыні,
• за заахвочванне да знішчэння касцёлаў,
• за перашкоды ў будаўніцтве касцёлаў,
• за знішчэнне крыжоў і прыдарожных каплічак, прысвечаных Марыі,
• за святароў і свецкіх людзей, забітых і зняволеных за абарону Касцёла,
• за пераслед і ліквідацыю манаскіх супольнасцяў,
• за недахоп адвагі ў вызнанні і абароне веры,
• за праклінанне Касцёла і яго вызнаўцаў,
• за шкоду, учыненую Касцёлу пры выкарыстанні магіі і акультных практыкаў,
• за нягоднае пахаванне памерлых,
• за атэізм і адыход ад веры,
• за кожнае зло, учыненае для таго, каб знішчаць веру ў сэрцах людзей.

У хвіліну цішыні ўспомнім людзей, якія спрычыніліся да знішчэння Касцёла. Магчыма, гэта нашы знаёмыя, блізкія ці мы самі. У глыбіні сэрцаў прабачым ім і самім сабе.

(Хвіліна цішыні.)

Н.: Ойча наш…

С.: Молімся за памерлых, якія пры жыцці выцерпелі выпрабаванні з-за пераследу веры, а таксама за тых, хто пераследаваў хрысціянаў.

Н.: Вечны адпачынак…

Спеў-суплікацыя: Святы Божа, Святы Моцны, Святы Несмяротны, змілуйся над намі! (паўтараецца тройчы).

Можна прачытаць урывак са Святога Пісання: Пс 51, 3–13.

Перапрашэнне за духоўных асобаў

С.: «Калі хто хоча ісці за Мною, няхай адрачэцца ад сябе, штодня бярэ крыж свой і ідзе за Мною. Бо, хто хоча жыццё сваё ўратаваць, загубіць яго. А хто загубіць жыццё сваё дзеля Мяне, той уратуе яго» (Лк 9, 23–24).

Езу, Адзіны і Найвышэйшы Святар, на Тваю любоў мы адказвалі Табе занядбаннем, маўчаннем і няўдзячнасцю. Прабач нам, Пане, прабач за нашу абыякавасць, за ігнараванне Цябе, за знявагі, якімі абражаюць Цябе людзі, пакліканыя да служэння Табе і кіравання Божым народам. Прабач нас за грахі ў адносінах да духоўных асобаў.

Пасля кожнага закліку адказваем: Даруй, Пане, даруй свайму народу, бо навекі міласэрнасць Твая,

— за недахоп належнага клопату пра святыні і парафіі,
Н.: Даруй, Пане, даруй свайму народу, бо навекі міласэрнасць Твая,

• за руцінную малітву,
• за недахоп любові да вернікаў,
• за руцінную малітву,
• за недахоп любові да вернікаў,
• за ўпаданне ў залежнасці,
• за занядбанне евангельскіх парадаў і парушэнне дадзеных Богу абяцанняў,
• за спакушанасць прывідам багацця,
• за нягодную цэлебрацыю святых сакрамэнтаў,
• за занядбанне пастырскіх абавязкаў,
• за дрэнны прыклад жыцця,
• за недахоп самаўтаймавання і духоўную ляноту,
• за недахоп пабожнасці,
• за адыход ад святарства і кансэкраванага жыцця,
• за страх пайсці па шляху паклікання,
• за намову кінуць святарства і кансэкраванае жыццё,
• за адбіванне ахвоты да служэння Богу,
• за перашкоды і забароны ў адносінах да людзей, якія жадаюць паступіць у духоўную семінарыю або ўступіць у манаскую супольнасць,
• за высмейванне духоўных асобаў,
• за недахоп малітваў аб пакліканнях,
• за недахоп малітваў за святароў і кансэкраваных асобаў,
• за спакушэнне духоўных асобаў да граху,
• за даносы і абгаворы ў адносінах да духавенства.

У цішыні ўзгадаем духоўных асобаў, якія не давалі нам добрага прыкладу або якім мы самі ўчынілі крыўду. Прабачым ім і самім сабе.

(Хвіліна цішыні.)

Н.: Ойча наш…

C.: Молімся за памерлых святароў і кансэкраваных асобаў Беларусі, а таксама за ўсіх, хто тут працаваў.

Н.: Вечны адпачынак…

Спеў-суплікацыя: Святы Божа, Святы Моцны, Святы Несмяротны, змілуйся над намі! (паўтараецца тройчы).

Можна прачытаць урывак са Святога Пісання: Езд 9, 5–15

Перапрашэнне за грахі беларускага народа

С.: «Як хочаце, каб рабілі вам людзі, так вы ім рабіце. Калі любіце тых, хто любіць вас, якая вам за гэта падзяка? Але вы любіце ворагаў вашых, рабіце дабро і пазычайце, не чакаючы нічога ўзамен, а ўзнагарода вашая будзе вялікая, і будзеце вы сынамі Найвышэйшага, бо Ён ласкавы да няўдзячных і да злых. Будзьце міласэрнымі, як і Айцец ваш міласэрны» (Лк 6, 31.35–36).

Уваскрослы Хрыстэ, Ты ведаеш нашы клопаты і выпрабаванні, і нястомна кажаш нам: нічога не бойцеся, Я тут. Хрыстэ, мы даручаем Табе беларускі народ. Пакажы сваю прысутнасць тым, хто церпіць ад гвалту і лютасці. У Табе наш супакой.

Пасля кожнага закліку адказваем: Даруй нам, о Езу Міласэрны,

— за 70 гадоў камуністычнага тэрору,
Н.: Даруй нам, о Езу Міласэрны,

• за помнікі ідалам і ка́там,
• за вуліцы, названыя імёнамі садыстаў і ка́таў,
• за непавагу да нашых нацыянальных сімвалаў,
• за тысячы даносаў,
• за мільёны закатаваных і забітых,
• за несправядлівыя прысуды і нявінна асуджаных,
• за парушэнне закону ў нашай краіне,
• за парушэнне правоў чалавека і грамадзянскіх правоў у нашай краіне,
• за палітвязняў,
• за карупцыю, крадзеж і іншыя злоўжыванні службовымі асобамі,
• за пагрозы адабраць у бацькоў дзяцей,
• за дзяцей, што гадамі не бачаць бацькаў, якія несправядліва зняволеныя,
• за тэракты з ахвярамі,
• за здзекі над людзьмі,
• за тое, што дапусцілі валадарства хлусні, страху і гвалту,
• за нашае маўчанне,
• за боязь сказаць праўду,
• за знявагу крыжоў у Курапатах,
• за нашу ціхую згоду з усялякім злом — на працы, вуліцы, дома,
• за наш дыялог са злом,
• за падпарадкаванне нашых жыццяў і душаў начальству і ўладам, а не Табе, Пане,
• за крывадушнасць і хлусню,
• за беззаконне, якое пануе ў нашай краіне,
• за нянавісць да ні ў чым нявінных настаўнікаў і праваахоўнікаў.

У цішыні ўзгадаем тых, хто ўдзельнічаў ці працягвае ўдзельнічаць у гэтых беззаконнях. Узгадаем таксама тыя выпадкі, калі мы ў гэтым удзельнічалі, ці проста маўчалі і безаконне адбывалася з нашай маўклівай згоды. Прабачым гэтым людзям і самім сабе.

(Хвіліна цішыні.)

Н.: Ойча наш…

С.: Молімся за памерлых нашай зямлі, якія не змаглі пераадолець свой страх. Таксама молімся за тых, хто змагаўся на баку Бога і любові.

Н.: Вечны адпачынак…

Спеў-суплікацыя: Святы Божа, Святы Моцны, Святы Несмяротны, змілуйся над намі! (паўтараецца тройчы).

Перапрашэнне за грахі вернікаў

Наймілейшы Езу, просім Твайго прабачэння і раскайваемся ў грахах, якія ўчынілі мы самі на працягу ўсяго жыцця. Змілуйся і прабач нам.

Пасля кожнага закліку адказваем: Перапрашаем Цябе, Езу,

— за парушэнне Божага Закону ў грамадскім і асабістым жыцці.
Н.: Перапрашаем Цябе, Езу,

• за недахоп штодзённай малітвы,
• за недахоп даверу да Бога і невыкананне Яго волі,
• за адсутнасць на святой Імшы ў нядзелі і прадпісаныя святы,
• за нягоднае прыняцце святых сакрамэнтаў,
• за пыху і эгаізм,
• за сваркі, хлусню, абгаворы і паклёпы на бліжняга,
• за прагу адпомсціць і ўчыніць зло бліжняму,
• за нянавісць і недахоп еднасці ў сем’ях,
• за разбітыя сем’і,
• за аборты і заахвочванне да іх,
• за грахі ў сексуальнай сферы, учыненыя думкаю, словам і справаю,
• за падпарадкаванне грахоўным плыням сучаснасці, якія не адпавядаюць вучэнню Касцёла,
• за п’янства і алкагалізм,
• за крадзеж, асабліва грамадскай уласнасці,
• за недахоп клопату пра катэхізацыю дзяцей і ўнукаў,
• за недахоп адказнага выхавання дзяцей у духу веры і хрысціянскай любові,
• за недахоп прабачэння і паяднання,
• за імкненне больш мець, чым быць,
• за ігнараванне людзей, якім патрэбна дапамога,
• за невыкананне ўчынкаў міласэрнасці адносна душы і цела,
• за веру ў забабоны і варажбу,
• за пракляцці і шуканне дапамогі ў нячыстых сілаў з мэтаю нашкодзіць бліжняму,
• за невыкарыстанне ласкаў Надзвычайнага Юбілейнага Году Божай Міласэрнасці. 

У хвіліну цішыні ўзгадаем людзей, якія ранілі нас, якім мы не прабачылі і з якімі не паядналіся. Успомнім таксама грахі, за якія хочам асабіста перапрасіць Бога. Прабачым бліжнім і самім сабе.

(Хвіліна цішыні,)

Н.: Ойча наш…

С.: Молімся за памерлых, якія чакаюць нашай малітвы.

Н.: Вечны адпачынак…

Спеў-суплікацыя: Святы Божа, Святы Моцны, Святы Несмяротны, змілуйся над намі! (паўтараецца тройчы) 

На заканчэнне можна памаліцца Літаніяй да Найсвяцейшага Сэрца Езуса.

Фота: Віктар Малышчыц